乘搭HKEXPRESS 1645 去昆明
記得喺飛機 都見到有好多香港人
都係幾一PAIR PAIR去
不過今次係我自己去嘅旅行 都無話葡唔葡萄
好 入返正題
咁坐咗兩個鐘頭多啲 就已經到咗昆明長水國際機場喇
喺飛機嗰陣 唔知係咪喺昆明嘅上空 都感受到陣陣寒氣
落咗機就更加感受到
不過時間都幾趕 一落機搞掂哂衝出去機場外面買機場大巴嘅車飛
十三蚊人仔 都幾平 就搵一搵機場大巴喺邊 就直接上咗車
由機場去火車站車程大概45分鐘多啲 心情有啲趕急 因為未拎火車飛
點知落車嗰個位唔係喺火車站落 要行300幾米先到 (當地人講)
一行到去火車站附近 原來係咁熱鬧
見到好多小販檔 見到好多公安唙度巡邏
同埋行去火車站入面 必先經過出口嘅 見到個出口位好多人
呢個位係特別驚人趁混亂偷嘢
攬實啲袋 狗衝咁行過去入口
要入到去個售票處 就一定要經過安檢先得
幾經波折 終於可以排隊去拎飛
如果大家係網上買火車飛 八號窗係一定可以拎到嘅
喺排緊隊嗰陣 都會上下網 同屋企人報個平安
咁我有部SPARE電話係 有大陸電話卡 咁我就喺個袋係咁搵返個電話啦
搵極都無 就心知不妙
我記返起 我喺大巴起身嗰下聽到有跌嘢聲 以為唔係我 我無為意 嗰陣又有啲焦急
拎哂所有行裝就落咗車
(一個人去旅行真係唔可以咁心急 一急就乜都唔記得哂-_-)
如是者 我足足排咗個半鐘先可以拎到張火車飛
因為不斷有人打尖 求我前面啲人幫佢哋拎埋飛
我十點十四分火車 我十點仲喺個售票處先拎完飛
排緊嗰條隊 我前面係有一個廣州女人 同一個香港家庭
大家都係趕火車 就係俾前面啲人打尖 搞到啲時間咁趕
同一時間 望到隔離隊有兩PAIR男女 都係香港人
因為真係好趕時間 我都唔要面咁問佢哋係咪拎咗火車飛
點知其中一PAIR 係同我一樣 都係趕同一班火車
但係個男嘅 因為個名問題 拎唔到火車飛 要退咗佢 要重新買過
喺排緊隊其間 知道佢哋都同我一樣去同一個地方
咁我終於喺混亂之下攞火車飛 直奔月台上車
由於我嗰卡係第六卡 我喺第十卡上 要行四卡 但係路太窄 勁唔方便
幾經辛苦 終於行到去第六卡同埋我間房
我係瞓軟卧 一房有四張床 我同房都到哂
我就整理下自己啲嘢 食下包 玩下電話 就去瞓覺喇
(麵包好彩係去搭巴士之前買 好彩有買定 如果唔係實餓死)
十個半鐘火車之旅正式開始
第一日就係咁